Plantun de Prouvènço

Pèr coumpara dos planto d'encò nostre

Panicum barbipulvinatum & Vicia bithynica

Panicum barbipulvinatum

Poaceae Graminaceae

Noms en français : Panic des rivages, Millet des rivages.

Descripcioun :
Aquéu mi fèr, que nous vèn d'Americo de l'uba, sèmblo proun au mi-prim, Panicum capillare, que se rescontro proun dins lis ermas e li champ à l'autouno. Se n'en destrìo emé sis espigueto de coustat que soun pourtado pèr de pecou courtet (< 3 mm) e que rèston proun proche de la ramo (< 10°). D'un biais generau lis espigueto soun mens aluenchado lis uno dis autro. Apoundèn qu'aquéstis espigueto soun mens grosso e pu fino. Pèr l'ouro es esta vist soulamen dins la valado dóu Rose, mai poudèn pensa qu'aquesto meno vai s'espandi. Coumpara emé lou mi-prim e lis àutri mi se n'avès pas l'usanço.

Usanço :
A bessai li mémis usanço que soun cousin lou mi-prim.

Port : Erbo
Taio : 20 à 80 cm
Fueio : costo paralèlo
Tipe bioulougico : Teroufite
Cicle bioulougico : Planto de l'an

Gènre : Panicum
Famiho : Poaceae
Famiho classico : Graminaceae

Ordre : Poales

Coulour de la flour : Verdo
Petalo : ges
Ø (o loungour) enflourejado : 15 à 20 cm
Flourido : Estiéu - Autouno

Sòu : Ca
Autour basso e auto : 0 à 400 m
Aparado : Noun
Juliet à óutobre

Liò : Ermas - Champ - Limas
Estànci : Mesoumediterran à Subremediterran
Couroulougi : Óurigino Americo-Nord
Ref. sc. : Panicum barbipulvinatum Nash, 1900

Vesso(-de-Bitinìo)

Vicia bithynica

Fabaceae Leguminosae

Nom en français : Vesce de Bithynie.

Descripcioun :
Aquelo vesso, pulèu grando, porto de flour groupado de uno à tres, di dos coulour (blanco e vióuleto), emé un pecou mai o mens long (1 à 6 cm). Vèn bèn dins li relarg séusous. Li fueio d'en bas an un parèu de fueioun, e mai pèr li fueio d'en aut (2 à 3 parèu emé uno vediho). Li dóusso soun pelouso (de 2,5 à 5 cm). Poudès peréu aluca lis estipulo que dounon d'èr à d'alabardo.

Usanço :
Ramenten qu'èi pas counseia de manja de grano de vesso, que soun empouisounanto e dounon uno malautié néuroulougico, lou latirisme (presènci d'ODAP).